![](https://vivans.home.blog/wp-content/uploads/2021/01/img_9950.jpeg?w=825)
Sekre Mo Lam
Lazwa Amen Lalimyer
To sourir li zoli
Me to larm vo plis ki lor
Sak gout ki tombe
Kouma enn rises ki pe anvole
To lazwa li enn lafors!
Enn lafors ki fer mwa avanse
Fer twa avanse
Pou nou pa perdi vision lalimyer
Ki briye lor nous sime
M Kyle
Michael I
Enn Sourir, Enn Regre
Mo konn twa e to ban sekre
Pa kone si bon ou move
Me mo kone mo gayn riye
Sak fwa mo ekut twa koze
Me dan to leker ena regre
Bann douler to pa fouti efase
Mem kan to riye
Don sa Bondie, less li sarye
M Kyle
Michael I
Refle Dan To Lizie
To kouma mwa, mo lam reflet dan to lizie
Kan mo dir twa to zoli to figir ilimine
Enn lazwa rempli twa
To zet enn regar dou lor mwa
Avek enn sourir ki revey mo lam
Pa kone ki pran mwa
Ler to may mwa,
Mo santi to parfum ziska mo lam
To fer mwa blie mo parol
Mo ban mo anvole
Mo gayn so!
M Kyle
Michael I
Kredi Konsomasyon
Lamour pa aste par kredi
Enn santiman ki zame fini
Me nou fini par blie li
Eski to pre pou viv li?
Avan aret koz to mem manti
M Kyle
Michael I
Konstriksyon
Si ros la tomb dan to zardin
Pran li aranz enn pont
Non pa enn miray
Fer enn seki bon
Solid, san oken fay
Mem si li deman bokou travay
Li pou donn seki to bizin
Enn pasrel ver to destin
M Kyle
Michael I
Vous devez être connecté pour poster un commentaire.